محمد أنور يكشف سر ظهور نجاة الصغيرة على كرسي متحرك

كشف الفنان محمد أنور، سر ظهور النجمة نجاة الصغيرة، على كرسي متحرك أثناء تواجدها في المطار لمغادرة المملكة العربية السعودية، وذلك بعد حضورها حفلة Joy Awards، الذي أقيمت يوم السبت الماضي بالرياض.

وقال محمد أنور، في تصريحات صحفية : كنت من المحظوظين إني قابلت الست الجميلة نجاة الصغيرة، لأني بحبها بشكل مش طبيعي، زي كل الوطن العربي اللي بيحبها، ولما أتكلمت معاها كانت في منتهى الرقي والشياكة.

وعن كواليس صورته معها، قال محمد أنور: كنا راجعين من Joy Awards، وإحنا في صالة المطار شٌفت أستاذة نجاة، رحت أنقل لها رد فعل الجمهور، وقُلت لها أول ما ظهرتي كانت لحظة انبهار للكل، والناس مبسوطة وقالوا إن أجمل ما في الحفل هو ظهورك، وأنا شُفت في عينيها الفرحة وكانت بتقول الحمد الله.

واستكمل محمد أنور: ظهور نجاة فكرتني بأيام جميلة، وفي مظاهرة حب، أي فنان بيفرح برد فعل الناس عليه وإن الناس مشتاقة له بعد سنين كتير.

كما تطرق محمد أنور للحديث عن سبب ظهور نجاة الصغيرة على كرسي متحرك، قائلًا: كانت على كرسي متحرك بسبب أن صالة المطار طويلة وفي إجراءات، وعلشان أي واحد كبير في سن بيجيبوا كرسي متحرك، علشان يسهلوا حركته، لكن هي كويسه وبتمشي عادي.

أضاف محمد أنور: نجاة الصغيرة قمر من غير فلتر، وشكلها أحلى وأصغر مني بكتير، نجاة جميلة وروحها حلوة.. سواء في الطيارة أو المطار الناس كانت مبسوطة أن نجاة جنبهم ربنا يخليها لينا.

واختتم محمد أنور: ظهور نجاة الصغيرة فرق معاها نفسيًا ومعنويًا، ودي تفرق مع أي نجم كبير، في نجوم كتير كانوا يتمنوا إنهم يتكلموا معاها أو يتصوروا، فأنا كنت من المحظوظين إني اتكلمت معاها.